.

السلآم عليكم ورحمة الله وبركاته

أحبآئي و اعزائي زورا و اصدقاء و محبين .. مدونتي المتواضعة ..

نود أن نحيطكم علما أنني في هذا اليوم الجمعة الموافق 13-5-1430 <<-- اعتقد انه اليوم 13

الموهيم قررت أن أترك عالم التدوين بصفة خاصة و عالم النت بصفة عامة ..

وذلك لأتفرغ لدراستي و دفرتي التي لم استفد منها في حياتي العملية الا في القراءة و الكتابة و الجمع و الطرح ..

يعني راح اخذ اجازة قصيرة باذن الله .. الين اخلص الترم الثقيل دا و اعديه على خير باذن الله ..

دعوآتكم ليا ولكل طالب وطالبة .. الله ينجحنا على خير و بالدرجات اللي ترفع الراس يــــآرب ..

وقبل ما اروح في هرجة تقرقع بقلبي الصغير ابغى اطلعها ..

قولولي مبروووك ..

أمس خالتي تقولي .. جآكي عريس .. .. وراحت تجري تقول لجدتي .. وانا اجري وراها ابغى اعرف الهرجة ..

بس طبعا اشوا قالو لأم العريس .. البنت مخطوبة ..

جدتي دايما تقولي .. يآ ري ري بس سيبيه ايش تبغي فيه اللي هناك .. ؟؟!!

نفسي اقولها .. يآجدتي الله يهديك ويصلحك .. القلب و مايهوى .. ..

ومافي غيره سكن روحي .. حبيبي وانا أحبه .. لو قالوا تمنى .. أتمنى عمري بقربه .. <<-- مو صاحية شطحت البنت (وفي رواية نسيت نفسها وراحت لبعيد)..

بس طبعا اخاف اقولها كدا و ما احس بنفسي الا وانا مغمى عليا بالضربة القاضية .. <<-- ولك يضرب الحب شو بيزل .. <<-- ايش دخل المثل مدري

و تقولي جدتي .. ايش رايك تاخدي واحد من عيال اعمامك احسن ولا ..؟؟!! <<--- تعرف انه الموضوع دا يستفزني ويقهرني ..

اقوولهااا لو على جثتي ما اخذ واحد منهم .. <<-- متعقدة ..



آآهـ يـآ البي 7 شهور .. !! .. سبحانك ربي .. يـــآالله يـــآرب تكووون هــــآنت ..

اجمعنا على خير و سعادة يـــــــــآرب ..

وأخيرا قبل ما أترككم و اتفرغ لدراستي و مشاريعي ودوختي ..

عندي نكتة طريفة لطيفة قميلة .. اتمنى ترسم البسمة على شفاهكم .. تذكروني فيها بالخير ..

لحين عودة سيادتي الموقرة لمدونتي اللطيفة باذن الله ..

يقولكم فيه محشش تزوج .. سألوه .. تزوجت مين .. ؟؟

قالهم .. تزوجت حرمة .. !!

قالوله .. أكيد تزوجت حرمة .. فيه أحد يتزوج رجال ..؟!

قالهم .. ايوة أختي اتزوجت رجال ..!

طن طرريررينطن طن طن .. اضحكوا حتى لو سخيفة ..

ويللا استودعكم الله الذي لاتضيع ودائعه