وحــــشـــتــــــوووووووني .. الهي يسعدكم ..

اعتذر ع الانقطــاع .. و شــــاكرة من اعماق اعماق اعماق شرايين و اوردة قلبي لكل من ذكرني بدعوة .. رسالة .. و سؤال ..

لاحرمكم ربي من عزيز و لا غالي ..



لسه انا في حالة ترميم داخلي لنفسي .. ان شاءالله نهاية الترميمات تطلع فيلا محترمة .. <<--بدت تحشيش ..

ماراح اطول عليكم حكي .. و راح ادخل في الموضوع على طول .. معليش البوست يمكن طويل وثقيل دم .. بس كيفي موضوعي وانا حرة .. خخخخخ

اللهم ما أصبح بي من نعمة أو بأحد من خلقك فمنك وحدك لاشريك لك فلك الحمد ولك الشكر

^

^

من قالها فقد أدى شكر يومه

فعلا الانسان مايحس بقيمة النعمة اللي هو عايش فيها الا لما يفقدها .. !

يمكن نكون فكرنا في دي النعمة و شكرنا ربنا عليها .. لكن فعلا مانحس بقيمتها و قد ايش هيا مهمة بحياتنا الا لما نفقدها ..

.

.

جالسة في بيتي مستريحة معززة مكرمة .. "اللاب توب" قدامي .. و "ريموت" التلفزيون بيدي .. و المكيف يبرد عليا حر الصيف .. يارب لك الحمد و الشكر .. فعلا نعم عظيمة ..

المهم .. اقلب قنوات التلفزيون ادور على اي شي يسليني .. و اذا طفشت جلست اطقطق ع اللاب توب ..

ياااه الحمدلله والله عايشة بنعمة اي شخص يتمناها .. شوية فجأة و بدون سابق انذار .. التلفزيون و المكيف ينطفوا .. !!

وي الكهرباء انطفت .. مرة مو وقتها .. ولكن اكتشفت انه مو كل الكهرباء بالبيت انطفت .. 220 بس هيا اللي انطفت و لا الباقي سليم ..

طيب يارب لك الحمد نعمة عظيمة اخترعوا 110 و 220 .. هع هع

باقي جهازي اللاب توب يشتغل معايا .. بس مافي مكيف ولا تلفزيون ><.. يللا اللاب توب يكفي عنهم .. والله نعمة الحمدلله ..

وبدأ الحر يزيد شوية شوية .. تذكرت اختراع عظيم اسمه "المروحة" <<---في وجود المكيف وربي نسيت شي اسمه مروحة خخخخخ

و شغلت المروحة .. يااه ياربي لك الحمد فيه شوية هواء يخفف الحرارة .. فعلا اكتشفت انه المروحة نعمة عظيمة ..

وبدأ المغرب يقرب و الين دحين 110 شغالة تمام و فيه لمبات تنور البيت .. طيب الحمدلله يارب ..

ولكن شركة الكهرباء الوضع كدا مايعجبها .. لازم تطفشنا .. هع هع

قبل المغرب بنص ساعة تقريبا .. انطفت 110 .. !!

لاااااا .. مافي كهرباء بالبيت يعني مافي اضاءة ولا فيه تهوية ولا نت ولا لاب توب .. يعني مافي اي شي ..

وي يعني النعمة خلصت استغفرالله .. !!

دخل علينا الظلام .. و مافي اي اضاءة .. الا "الشمعة" .. جلست اتأملها في الظلام الدامس ..<<--- ماوجه الشبه بينه وبين الفول المدمس .. !!

يــااااااه يالشمعة .. والله انك نعمة عظيمة و اللي اخترعك فعلا انسان ذكي يستاهل جائزة نوبل للسلام .. !!

التهوية مرة سيئة و الحر اسوأ .. نزلنا "للفناء الخارجي" <<-- متعوب عليها فناء ..

الحمدلله يارب في هواء برا .. والله الهواء نعمة من ربي .. الحمدلله يارب ..

تذكرت في دي اللحظات .. انه فيه ناس عايشة اصلا بدون بيت يلمها .. فيه ناس عايشة في الظلام اسابيع وشهور .. فيه ناس مو قادرة تشم حتى نسمة الهواء الصغيرة .. !

فيه ناس مو قادرة تغمض عيونها من الخوف .. مو حاسة بالامان .. عايشين في حرب .. الله اعلم متى تنتهي .. فيه ناس عايشة بعيد عن اهلها .. فيه ناس مايعرفوا اهلهم احياء ولا لا .. !

يــــــاااااه يــارب فعلا انا عايشة بنعمة عظيمة .. الحمدلله عندي بيت .. عندي اهل .. عارفة اني ممكن اغمض عيني في اي وقت وانا متطمنة ومرتاحة .. نعمة الامان شي عظيم ..النعم اللي ربي اداني هيا لاتعد ولا تحصى .. يارب لك الحمد كما ينبغي لجلال وجهك وعظيم سلطانك ..

وبعد ساعات من الانتظار ماقدرت اتحمل الوضع زيادة .. خرجنا انا و اخواني .. ورحنا لبيت جدتي .. ياربي لك الحمد عندي اهل وقت الرخاء و وقت الشدة ..

فعلا حياتي كلها نعمة من ربي .. !

جربوا بينكم وبين نفسكم .. تعدوا النعم اللي حوليكم .. !

<<--- والله راح تناموا و انتوا لسه ماخلصتوا ..