مدونة ري ري

الاثنين، 30 يونيو 2014

بارك الله لكم في رمضان ..~

3:44 م | كتبتهآ .. ري ري |

تعديل الرسالة

كل عام و أنتم بخير .. واللهم لك الحمد أن بلغتنا رمضان و نحن ومن نحب بأتم صحة و عافية ..

أتمنى إنكم جميعا تكونوا بصحة و سعادة .. و استقبلتوا رمضان بروح حلوة و استعداد للتنافس للجنان بإذن الله ..

هيا كلها 29 يوم و نقول خلص رمضان .. فاستغلوها احسن استغلال و سيبوا التلفزيون و غيره لبعدين .. =)

الموهيم .. عندي خبر صعنون .. بديت مشروعي الصعنون .. واللي هو اصلا هواية أحبها منذ نعومة أظافري

.. التصميم ..

مشروعي عبارة عن تصميم ثيمات حفلات ومناسبات وبطاقات تهنئة وشكر و"بزنس كارد" وأي شي له علاقة بالتصميم ..

اسم مشروعي و شعاره .. غيمة (تُمطر بهجةً أينما حلّت)

أتمنى تدعموني و تقدروا تشوفوا التصاميم و اخر اخبار المشروع على الانستغرام و تويتر gaimah_des@ ..

2 تعليقآتكم

الثلاثاء، 15 أبريل 2014

الفرق بين ورق الزبدة و ورق الشمع

2:33 م | كتبتهآ .. ري ري |

تعديل الرسالة

ازيكووو

؟؟

موضوع اليوم خفيف و لزيز .. بس حبيت اكتب عنه لانه انا دحين من فترة بسيطة اكتشفت الفرق الصغنون دا .. هو صغنون بس مهم جدا ..

راح اتكلم عن ورق الزبدة و ورق الشمع

اول شي ورق الزبدة او ورق الطبخ (baking paper / parchment paper)

الورق دا جداااا مفيد و جميييييل لاغراض الطبخ

نستفيد منه في ايش؟؟

هو مخصص للطبخ في الفرن يعني تستخدميه في الفرن بدون خوف باذن الله تغلفي صواني الكيك و الكوكيز و اي صينية راح تحطيها في الفرن و ماتبغي الاكل يلصق فيها .. تستخدمي ورق الزبدة .. (زمان كنت اعاني لما اسوي البراوني تحديدا حتى لو دهنت الصينية بشوية زيت .. بعد ماتبرد البراوني و احاول اطلعها من الصينية اجلس اتضارب معاها عشان تطلع بس مع ورق الزبدة الموضوع جدا ممتع و بسيط )

واذا خايفة من القصدير او الالمنيوم اللي نغلف فيه الاكل و نطبخه بسبب مضاره اللي نسمع عنها .. تقدري تحطي ورق الزبدة بين الالمنيوم و الاكل و كدا تطبخي بامان باذن الله

كمان ورق الزبدة لما تبطني فيه الصينية لما تخلصي طبخ راح يكون الغسيل و التنظيف اسهل بكثير لان الاكل مالصق في الصينية ..

و تقدري تحطيه ع سطح المطبخ اللي تعجني عليه يحافظلك على السطح نظيف و بنفس الوقت تقدري تشيلي الفتافيت من ع الورق و تحطيها في الصحن مع باقي المقادير ..

واذا الورق نظيف تقدري ترجعي تستخدميه اكثر من مره ..

ثاني شي ورق الشمع (wax paper)

بالنسبة لدا النوع من الورق .. ماينفع تستخدميه في الفرن .. لانه مع الحرارة العالية الشمع يذوب وينتقل لاكلك و ممكن كمان يولع الورق مع الحرارة العالية ..

يعني الورق دا مش مصنوع لاستخدامه في الفرن ..

طيب كيف نستفيد منه؟

ببساطة تستخدميه على سطح مطبخك عشان تحافظي على نظافة دواليبك وقت العجن و غيره ..

تستفيدي منه في تغليف الاكل للتخزين او قبل ماتحطيه في الثلاجة ..

طبعا ورق الزبدة و الشمع اتوقع كلهم متوفرين في اي هايبر ماركت مع ورق الالمنيوم و تغليف الاكل ..

وبس هيك موضوعي الخفيف خلص ان شاءالله تكونوا استفدتوا منه

1 تعليقآتكم

الاثنين، 2 ديسمبر 2013

فرن السيراميك و العناية به

9:45 م | كتبتهآ .. ري ري |

تعديل الرسالة

كيفكم صبايا؟ ان شاءالله تكونوا بخير و سعادة

الموضوع باين من عنوانه .. راح اتكلم عن طريقتي في تنظيف فرن السيراميك .. و راح اتكلم عن كم نقطة بداية و بعدين اوريكم بالصور طريقتي في تنظيف فرن السيراميك ..

اول شي انا جربت فرن الغاز و فرن الكهرباء الحلزوني و فرن الكهرباء السيراميك .. و بالنسبة ليا كلها ماتفرق عن بعض و حلوة في الطبخ و الخبز و كل شي ..

بس بالنسبة ليا كان افضل خيار هو فرن الكهرباء السيراميك لعدة اسباب ..

اولها و اهمها هو سهولة التنظيف و مايحتاج تفكي عيون ولا تركبي عيون ولا غسيل ولا حوسة هو سطح واحد تمسحيه و تنظفيه و تخلصي ..

ثاني شي كون شقتي تقع في دور ثاني يعني ح يكون فرن الغاز شي مستبعد .. عشان لا نتعب و احنا نطلع و ننزل باسطوانات الغاز ..

فزي ماقلت فرن الكهرباء السيراميكي كان افضل خيار بالنسبة ليا .. فكل وحدة تفكر بخياراتها و ايش الانسب و الاريح لها ..

وبعد ماقررت نوع الفرن و قبل ما اشتريه كنت مترددة لاني ما اعرف طريقة العناية فيه و كان فيه انواااع كثيييرررة بالسوق .. و لفيت ع المحلات اكثر من عشرين مرة عشان اقرر نوع الفرن اللي احتاجه و هل تأسيس الكهرباء في بيتي تناسب او لا ..

وكنت احيانا كثيرة لما اقرر اخد نوع اروح السوق الاقيه مخلص .. الين استخرت و قررت و اخذت فرن اسود من ماركة فريجيدير (frigidaire)

المهم لما تشتري اي جهاز في العالم اول شي تسويه و قبل ماتستخدمي الجهاز تقرأي الكتيب اللي يجي معاه من اوله لاخره ..

راح تعرفي كيف تستخدمي جهازك و كيف تعتني فيه و ايش الاشياء اللي تنفع او ماتنفع جهازك ..

بالنسبة لافران السيراميك عموما .. لازم قدورك اللي تستخدميها تكون قاعدتها مسطحة و مستوية عشان تثبت ع الفرن و عشان تتوزع فيها الحرارة صح .

ثاني شي قدور الالمنيوم ماتناسب فرن السيراميك لانها تبقع و تترك اثر عليها.

لااا تحطي قصدير تحت القدر وفوق عين السيراميك ح يذوب و يترك اثر وحش و يخرب فرنك!

تقريبا دي اهم النقاط اللي افتكرها حاليا .. اذا فيه شي معين حابين تعرفوه قولولي ..

ننتقل دحين لطريقتي في تنظيف فرني ..

اول شي صورة فرني وهو في اقذر حالاته

ههههههه

اول ما اشتريت الفرن جا معاه المنظف تبعه و الاسفنجة الخشنة نوعا ما لتنظيفه ..

بس بعدين خلص المنظف و الاسفنجة انهلكت من التمسيح .. فلما رحت السوبرماركت بحثت عن شي مخصص لفرن السيراميك و مالقيت للاسف .. (يقولوا فيه في ساكو بس لسه مارحت ادور اذا خلص اللي عندي ان شاءالله)

المهم اني اخترت كريم التنظيف جف بالحبيبات الفعالة .. و الاسفنجة اللي استخدمتها فيليدا (vileda)

طبعا استخدم الجزء الخشن منها .. و هيا بالنسبة ليا احسن نوع اسفنج جربته سواء لتنظيف الصحون او الحمامات .. الله يكرمكم ..

طبعا طريقة الاستخدام احط من الكريم على عيون الفرن او مكان البقع و اتركه دقائق .. ( عشان فرني مررة وسخ عبيته كريم المرة دي هههه)

وبعدها افرك بالاسفنجة

بعد كدا اجيب مناديل مطبخ او منشفة مبلولة و معصورة و امسح الكريم .. و بمناديل جافة امسح مرة ثانية و ارجع امسح بمنشفة مبلولة و بعدين جافة و انتهيت و صار فرني تقريبا يلمع .. ماشاءالله تبارك الله

اتمنى تكون النتيجة عجبتكم و استفدتوا ولو قليلا من الموضوع ..

كونوا بخير

26 تعليقآتكم

الجمعة، 25 أكتوبر 2013

كيف تخلصي طفلك من المصاصة..!؟

2:09 ص | كتبتهآ .. ري ري |

تعديل الرسالة

كيفكم ياصبايا ياحلوين

كل عام وانتوا بخير و ان شاءالله عيدكم كان حلو .. و سنة جديدة سعيدة للجميع يارب الله يملاها لنا بكل خير و فرح

بدون مقدمات .. البوست باين من عنوانه ..

- كيف اخلص بنتي من المصاصة (اللهاية) !؟
- كيف اساعد بنتي تترك او تسيب المصاصة !؟
- متى أنسب وقت عشان افك المصاصة من بنتي !؟
- هل راح تكبر بنتي و تصير طول بعرض و المصاصة لسه في فمها ..!؟
- هل راح تخرب اسنان بنتي و تصير بارزة لبرا ..!؟

اسئلة كثيرة كانت تدور ببالي قبل 5 شهور و مسببتلي كوابيس بالليل (مبالغة)
ليش قبل 5 شهور ؟ لانه الحمدلله قدرت اخلص بنتي من المصاصة و عن طريق الصدفة البحتة و بدون سابق تخطيط ..!!! و هو دا موضوعي اللي ح اتكلم فيه اليوم ..

اول شي بالنسبة لعلاقة المصاصة بالاسنان قرأت انها باذن الله ماراح تأثر خلال السنتين الاولى من حياة الطفل.

بنتي من اول يوم بالمستشفى اديتها المصاصة عشان افتك من بكاها خصوصا اني لوحدي بالغربة و هيك فكنت خايفة اسمع صوت بكاها مدري ليش بكاها كان يسببلي فلم رعب ..!!

المهم كنت اتوقع اي طفل في العالم تديه المصاصة راح يمسكها على طول بس اكتشفت انه مش كل الاطفال يتقبلوها (زي ولد خالتي اللطيف ماشاءالله عليه مارضي يمسكها على طول ههههه)!!
طبعا مرت الايام و انا مبسوطة ع المصاصة الحمدلله .. الين اكتشفت انه بنتي صارت مدمنة مصاصة و يمكن تحبها أكثر مني

..!!
تنام و تلعب و تتكلم و كل شي و المصاصة في فمها و كنت اخاف انها تصير ماتتكلم بشكل طبيعي او تتأخر في الكلام بسبب المصاصة اللي في فمها .. كانت تحبها لدرجة انه حتى لو طاحت من فمها و هيا نايمة كانت تبكي الين ارجعها في فمها و طبعا كبرت و صارت تحطها في فمها بنفسها ..!!

المهم الموضوع ماعجبني كدا لازم افك بنتي من المصاصة مايصير كدا .. وفي أحد الايام مرضت و رحت عند دكتورة الله يستر علينا و عليها و هزأتني ع المصاصة اللي فم بنتي (كنت شوية و أديها بوكس

واقولها الكلام سهل بس التطبيق صعب..بس ربكم ستر و مسكت أعصابي) .. و قالتلي الدكتورة شيليها من فمها دلوأتي ..!! و شلتها من بنتي مضطرة و بنتي تعبانة و تبكي تبغى المصاصة و الدكتورة تقولي ابدا لاتديها خلاااص ..

ورجعنا البيت و البنت تبكي

من الظهر الين العصر مارضيت تسكت الين اديتها مصاصتها ارتاحت و نامت .. و ساعتها حقدت ع الدكتورة و على نصيحتها

.. لانه وقت غلط جدا انك تحاولي تفكي المصاصة من طفلك و هو تعباان (هو ناقص مسكين) !

مرت الايام و نسيت موضوع المصاصة و قررت استسلم الى وقت لاحق ..

بدأت ادور في النت عن طرق للتخلص من المصاصة .. حتى نزلت تطبيق بالانجلش في الايفون فيه عدة طرق للتخلص من المصاصة .. حاولت ادور عليه عشان اجيبلكم اسمه بس مالقيته ..

المهم هنا راح اسردلكم بعضا مما اتذكر من الطرق للتخلص من المصاصة .. و في النهاية راح اقولكم كيف بنتي سابت مصاصتها خلال يوم واحد ..!!

_ أول شي لما تبغي تفكي المصاصة لازم طفلك يكون بكامل صحته و عافيته و مرتاح نفسيا و مافي اي شي متغير عليه سواء الناس اللي حوليه او البيت اللي هو فيه.

_ يُقال جربي تشيلي المصاصة عن طفلك و تخبيها عنه و تحملي بكائه خصوصا في الليل لمدة يومين او 3 و بعدها راح ينسى المصاصة و ترتاحي انتي و البيبي.

_ أو ابعدي المصاصة عن طفلك بالتدريج مثلا ماياخذها الا وقت النوم و بعدين احرميه منها وقت النوم الين يتخلص منها.

_ جربي تحطي فلفل أسود ع المصاصة و وريها طفلك يمكن يقرف او يخاف و مايحط المصاصة في فمه مره ثانية!

_ خذي دبوس او ابرة و اخرمي المصاصة..لما يجي الطفل يمصها ماراح تكون زي اول .. فممكن يكرهها خلاص و يسيبها.

_ ارمي المصاصة قدام طفلك في سلة المهملات..عشان يفقد الامل في عودتها و يعرف انها "يـع" و ذاهبة بلاعودة.

_ اذا كان طفلك كبير بما فيه الكفاية و يفهم كلامك..اشرحيله انه هو صار كبير دحين و مايحتاج المصاصة و انه فيه طفل ثاني يحتاج المصاصة اكثر منه!

أو تقدري تجربي طريقتي اللي خلصت بنتي من المصاصة ..!!
زي ماتلاحظوا في الصورة فيه مصاصتين صفرا و وردية .. الصفرا هيا المصاصة الصديقة الصدوقة لبنتي حتى مكسورة و مع ذلك بنتي مارضيت تسيبها !
في أحد الايام ضاعت المصاصة الصفرا حقت بنتي (كان عمرها سنة و شهرين او ثلاثة شهور).. و جلست تبكي الين أبوها راح اشترالها المصاصة الوردية و زي ماتلاحظوا (شكل الجزء اللي يحطه الطفل في فمه من المصاصة) يختلف تماما عن الشكل اللي اتعودت عليه بنتي .. اتمنى انكم فهمتوا عليا .. فلما بنتي حطتها في فمها ماعجبتها ابدا .. و ترميها .. و كل ماتبكي تبغى مصاصة اديها الوردية تجلس تتأملها و بعدين تحطها في فمها و ماتعجبها و ترميها .. و جلسنا على دا الحال اليوم كله (طبعا في دا اليوم لقيت مصاصتها القديمة بس ماخليتها تشوفها ابدا و خبيتها بالثلاجة على طول في حال اني استسلمت و قررت ارجعها لبنتي هههههه)

و أخيرا في صباح اليوم التالي بنتي استسلمت و عرفت انه مالها الا دي المصاصة الجديدة اللي ماعجبتها و قررت انها ماتحطها في فمها خلاص .. و ارتحنا نهائيا من شي اسمه مصاصة الحمدلله

..!! و ابوها متحسف ع الـ18 ريال اللي دفعها في المصاصة الجديدة ههههههههه .. دُعابة دُعابة

تحديث

نفس طريقتي طبقتها مع ولدي الله يحفظه و مشيت معايا تماااام

100% .. أنصحكم تجربوها اذا معقدتكم مشكلة المصاصة

و في نهاية موضوعي اتمنى اكون وفقت في طرح بعض الافكار اللي ممكن تساعدك انك تخلصي طفلك من المصاصة او اكون على الاقل ألهمتك بفكرة ..

والين يقرر طفلك يترك مصاصته لاتنسي تعلقيها بسلسلة قصيرة (عشان لاتلف حوالين رقبة طفلك لاسمح الله) عشان تحفظيها بعيد عن الارض و تقللي من تلوثها لصحة طفلك و حاولي تعقميها في موية مغلية من فترة لفترة.