Follow Me ~
About Me ~
- ري ري
- جدة, Saudi Arabia
- ابنة.. زوجة.. و أم.. خريجة جامعة الملك عبدالعزيز تخصص غذاء و تغذية.. أحب عائلتي الصغيرة و أحب التدوين و الرسم و التصوير و الطبخ و الاكل و كل حاجة حلوة في الحياة .. =)
الأربعاء، 2 مارس 2011
ولا أحد راضي ..~!!
4:13 ص | كتبتهآ ..
ري ري |
بسم الله الرحمن الرحيم ..
السلام عليكم ورحمة الله و بركاته ..
يا اهلييين و سهلييين جميعا ..
كيفكووم ان شاءالله بخييير ..
!؟
!؟في يوم من الايام الجميلة .. تحديدا يعني قبل كم يوم هع..!!
كنا ماشيين بالسيارة .. و فجأة نشووف تجممممع كبيييير .. نقرب من التجمع .. نبغى نعرف ايش الهرجة .. طلعوا مجموعة ناس ضد القذافي ..
طبعا عادي مو هنا الموضوع ..
احنا نكمل نمشي بالسيارة و نسمع بتجمهر ثاني و اصوات عالية .. لما قربنا .. شفنا ..
مجموعة حريم يطالبوا بحقوقهم .. او شي من هذا القبيل .. و هنا هيا دي زبدة الموضوع ..!!
يعني جلست افكر سبحان الله شي عجيب غريب .. الحريم هنا مو راضيين بوضعهم و مو عاجبهم و هما هنا ماخذين كامل و مطلق الحرية ..!!!
أدوهم حرية ماعرفوا يعيشوا ولا عجبهم الوضع .. طيب ايش نسويلكم يعني 
..!!؟؟
..!!؟؟و المضحك انو قبل مدة في تويتر هاش تاق طلع يطالب بحقوق المرأة السعودية ..!! ههههه .. يبغوا يصيروا زي الحريم اللي فوق اللي اصلا مو عاجبهم وضعهم 
..!!!
..!!!و المشكلة بالموضوع .. انو الحريم والله للاسف مو عارفين ايش الحقوق اللي يبغوها بالزبط .. كل وحدة في وادي تطالب بحاجة .. اللي تبغى تسوق .. و اللي تبغى تسافر و تروح و تجي بدون محرم .. و اللي كارهه رجال العالم كلهم بما فيهم ابوها و اخواها و ووو ..
و اللي جالسة تقول انتوا ياحريم السعودية منتوا احسن حريم في العالم فاهمين ..!! خير في مدرسة احنا
..!!؟
..!!؟و بعض الرجال دخلوا يتفلسفوا مسوي انو مع حقوق المرأة والله اعلم هوا ايش مسوي باخواتوا في البيت .. و حتى الاجانب دخلوا في الموضوع يدعموا نسائنا السعوديات للحصول على حقوقهم ..!!! خخخخخخخخخ اول شي شوفوا حريمكم ايش يبغوا بعدين تعالوا ادونا حقوقنا ..!!
..!!و المهم انهم خلطوا الحابل بالنابل .. فيه اشياء دينية مالكم يانسائنا الحق في المطالبة بتغييرها و فيه اشياء جاءت من التقاليد و العادات دي بكيفكم عاد سووا فيها اللي تبغوا .. تتظاهروا تعملولها حملة بكيفكم كل ناس و عاداتهم و تقاليدهم الله اعلم فيهم ..
و بعدين لا تخلوا الموضوع مجرد عناد بينكم و بين الرجال ..!!! ليش الرجال يسوي الشي فلاني و احنا لا ..!! ليش الرجال يشتغل الشغلة الفلانية و احنا لا
..!!
..!! اجل بالله مدري مين تقول فيما معناه .. ليش لما نهين الرجل نشبهه بالمرأة .. ولما نرفع قدر المرأة نشبهها بالرجل ..!!! ايش السسسسطحية في التفكير دي ..!! التشبيه مو للاهانة ولا لغيروا انما مجرد وصف بالقوة و الضعف ..!!
و كمان تم اتهامي بالانانية و اني ما احس ببنات شعبي و بلا بلا بلا ....... من دا الكلام اللي لا يودي ولا يجيب .. بس لانو فيه كم شغلة ماعجبتني و علقت عليها 
..!!!
..!!!ترا ضغطي ارتفع من بعض العاهات اللي بالمجتمع بالله كبروا عقولكم 
..!!
..!!اي نعم فيه اشياء عندنا و انظمة غريبة عجيبة ليس لها علاقة بالدين .. يبغالها تغيير و استئصال من جذورها .. لكن فرقوا بينها صح .. نادوا و طالبوا صح .. و انا اول الداعميين .. بس مو بالشكل التووحفة دا ..!!
يعني سبحانك ربي شر البلية مايضحك .. بعض الحريم ما أدري ايش يبغوا في حياتهم .. لا هنا راضيين ولا هناك راضيين ولا شي عاجبهم ..!!
ما نقول الا الحمدلله على كل حال .. والله لا يبلانا ..!!
التصنيفات:
السبت، 29 يناير 2011
قال ايش .. لو نزل ثلج في جدة قال !!
بسم الله الرحمن الرحيم ..
اعزائي .. اعتذر لكم من اعماق قلبي ع التخيل السخيف و المخيف ! اللي اتخيلتوا في تدوينتي السابقة .. سلمولي على جدة ..~!
قال ايش قال لو ينزل ثلج على جدة !! مدري "وش كنت أحس فيه" و انا اكتب التدوينة السابقة !!
هيا شوية مطرة و اتبهذلت الدنيا و جدة "غــيــر قت" !! كيف ثلج كمان !!
المشكلة و اللي يقهر القلب مش انو احنا في جدة مو قادرين نسوي مجاري زي الناس ولا عندنا امكانيات ولا فلوس .. المشكلة في الناس الـ &*%^#*#$)$%^*^&^*%)$)$&#&# اللي ما تخاف ربها .. و سارقة فلوسنا .. و مضيعة الامانة .. حسبي الله و نعم الوكيل فيهم ..
"الصور التالية وصلتني ع الايميل"
^
^
شكلو دا احسن حل لأهل جدة بلا سيارات ولا الواحد يشيل هم يغرق ولا يطيح في حفرة كدا مضمون الطريق ان شاءالله !!
والله قلبي محروووق كل ماشفت صور جدة .. مني عارفة لما ارجعلها ان شاءالله بعد كم شهر هل راح اعرفها ؟؟
مدري يعني هل هنا الناس اللي ماعندهم دين يحث ع الامانة و الاخلاص احسن مننا في شي !؟
هل الناس اللي ما عندها دين يحث على ان تحب لأخيك المسلم ما تحب لنفسك احسن مننا في شي !؟
تنزل علينا عواصف ثلجية و امطار رعدية و الحمدلله مو خايفيين من شي ولا شايلين هم شي بالعكس اجلس مبسوووطة اتفرج على خليط الثلج و المطر الجميل ..
و ثاني يوم الصباح نصحى و نروح دوامتنا ماشيين على شوارع نظيفة ..!!
ليييييش ليييييييييش ليييييييييش هنا مسلمين بلا اسلام .. وعندنا اسلام بلا مسلمييين .. ليييييييييش =""(
ليييش ح يكبروا اطفال متعقدين من المطر .. من الشي اللي المفروض يكون خير و حاجة تفرح ..!
لييش ح يعيشوا اطفال بدون اهاليهم لانهم ماتوا بسبب مطر ..!! عشان حضرة مسؤليين الامانة خانوا الامانة !؟
حسبي الله ونعم الوكيل
الجمعة، 21 يناير 2011
سلمولي على جدة ..~!
بسم الله الرحمن الرحيم
السلام عليكم و رحمة الله و بركاته
يسعد ايامكم جميعا .. =)
كيف الاجواء عندكم ؟؟ انا عن نفسي الاجواء هنا باردة ابرد شي .. =X
و متوقعين اليوم بالليل ينزل علينا ثلج ان شاءالله .. كل الامنيات القلبية بأن كمية الثلج تكون جدا كبيرررة عشان مانروح المعهد بكره ..=$ !! <<--- و عشان شايلة هم الواجب الطويل =P
المهم ماعلينا ماعلينا .. على طاري الثلج .. امممم ياترى لو يوم نزل ثلج على جدة ايش راح يصير ..!؟
راح نتجمد ؟ ولا نغرق ؟! ولا راح تتقفل الشوارع و زحمة و حالة ؟ ولا ايش راح يصير ياترى ..؟
كل مرة ينزل علينا هنا ثلج و مطر و ننزل الشارع افكر في حاجة وحدة .. لو الاجواء دي عندنا في جدة كيف راح يتم التعامل معاها !؟
هنا تنزل الثلوج بكمياااات كبيييرة و عواصف ثلجية و امطار .. تتوقعوا الشوارع صار فيها شي ؟؟؟
الشوارع ولا كأنو نزل ثلج .. اصلا بمجرد ماينزل الثلج تبدأ سيارات كبيرة تشتغل رايحة جاية تنظف الشارع .. وطول ما الثلج بينزل السيارات دي تنظف .. حتى ممرات المشاة تتنظف من الثلج ..!! ولا يتقفل شارع ولا تصير زحمة ولا غرق !!
يعني ايش المنظر لما يوقف الثلج ..!؟ دنيا بييييضة مغطية ثلج .. بس شوارع نظيفة !
.
الخميس، 6 يناير 2011
حياة جديدة ..~
بسم الله الرحمن الرحيم
السلام عليكم و رحمة الله و بركاته
يسعد أيآمكم جميعا .. زوآر المدونة الكرآم و المتابعين لها .. =)
غبت عن عالم التدوين و الكتابة بشكل عام قرابة الستة اشهر .. فاعذروني و اصبروا علي اذا لم استطع الكتابة بشكل جيد .. ريثما أعتادها مرة أخرى .. =)
قبل 6 أشهر من اليوم .. تغيرت حياتي كليا .. و انتقلت من حال الى حال .. <<-- من حال جميل الى أجمل و لله الحمد .. =)
أصبحت متزوجة .. و مغتربة .. انتقلت من بيت والدي .. الى بيتي =) .. و انتقلت مع زوجي من بلادنا الحبيبة الى بلاد الغربة "الولايات المتحدة الامريكية" .. ريثما ينتهي زوجي من دراسته " دعواتكم له بالنجاح =) "
بدأت ادرس اللغة قبل 3 اشهر و اتمنى ان انتهي منها الشهر القادم باذن الله .. " كمان دعواتكم ليا بالنجاح D= "
لن اتحدث عن حياتي الجديدة فلا اعتقد ان فيها مايهم .. و لكنني سأتحدث عن البلاد الجديدة التي أسكنها الان .. و هيا بالطبع تختلف تمااااامااا عن بلادي الحبيبة .. =)
اممممم حديثي هنا لا اعتقد انه سيكون ذو قيمة او فائدة تذكر .. كل مافي الامر هو انني اود تدوين بعض النقاط عن ماوجدته هنا .. نقاط مهمة نقاط ليش لها اي معنى .. المهم سأكتب .. فلكم ان تقرأوا ما كتبت ولكم ان تغلقوا النافذة .. لا شيء اجباري هنا .. <<-- لايكثر بس !
و قبل ان ابدأ بتدوين النقاط أحب أن اغير طريقة كتابتي من العربية الفصحى الى العامية .. " عشان اخذ راحتي في الكتابة =$ "
بسم الله نبدأ ..
* الجو هنا طبعا يختلف 180 درجة عن الجو اللي اتعودت عليه .. في الصيف الجو مرررة جميل .. يميل احيانا للحرارة .. و في الشتاء"دحين يعني" .. البرررد قااااتل .. درجة الحرارة الين دحين وصلت -10 .. ودي الدرجة جدا مؤلمة بالنسبة لوحدة كانت ابرد درجة حرارة في حياتها 20 درجة ..هع !!
* امممم الطبيعة هنا مرررررة غير شي مرررة روووعة و كل حاجة خضراء .. "اشتقنا نشوف رمل اصفر" خخخخ .. و اول مرة في حياتي اشوف الفصول الاربعة بأم عيني !! بالنسبة ليا الين دحين .. فصل الخريف كان من أجمل الفصووول .. جدا رائع .. الجو يجنن و الاشجار تصير أخضر و اصفر و احمر و اورنج .. مرة واو ..
* شوارعهم تعتبر نظيفة جدا جدا جدا مقارنة بشوارعنا .. اكيد فيه كم قارورة و كم كيس لكن شيء لايذكر ..
* النظام شي مررررة جيد و كلهم ملتزمين فيه و البوليس متخبين في كل حته ! .. شوارعهم مليااااانة لوحات على الجانبين .. لكن مافي ولااااا لوحة غير مفيدة ..!!
* النت هنا مرررررة مستفيدين منه بشكل حلووو اي شي تبغى تدور عليه ح تلاقيه في النت .. السوبرماركتات المولات دفع الفواتير اللي تبغاهاي شي تدورله راح تلاقيه و راح يفيدك اكيد ..
* امممم بالنسبة ليا كنت متخوفة جدا من حكاية المضايقات و الكلام و ما الى ذلك .. خصوصا اني امشي بحجابي "عباية و طرحة و متلثمة" .. لانه بالذات حكاية الغطا و اللثمة دي مرة شي غريب عندهم .. فكنت شايلة هم .. بس الحمدلله ماشاءالله 6 شهور ماشية بينهم ماقد صارلي موقف سيء ..
* الاكل عانينا في البداية عشان نلاقي اكل زي الناس بس الحمدلله دحين مشيت امورنا و بدأت اعرف مكان الاشياء اللي احتاجها و فين ممكن الاقيها ..
.
.
.
امممم هيا دي النقاط اللي في بالي الان .. ممكن تزيد اذا اتذكرت حاجة .. =)
و اذا فيه اي سؤال .. انا موجودة .. =)
*المزيد من الصور راح تكون موجودة ع الفلكر تبعي
الاشتراك في:
الرسائل (Atom)