Follow Me ~

 

About Me ~

صورتي
جدة, Saudi Arabia
ابنة.. زوجة.. و أم.. خريجة جامعة الملك عبدالعزيز تخصص غذاء و تغذية.. أحب عائلتي الصغيرة و أحب التدوين و الرسم و التصوير و الطبخ و الاكل و كل حاجة حلوة في الحياة .. =)

تابعوني من هنا

تابعوني بالبريد الالكتروني

الخميس، 15 أغسطس، 2013

عدنا..~



مررررحبااااا جميعا


فاكريني .. ايوة انا ري ري لسه حيةالحمدلله الله يطول عمري بصحة و عافية و سعادة على خير يارب ..

كل عااام وانتوا بألف خير و عافية و سعادة و ان شاءالله كان عييدكم سعييد يااارب ..

ايش رايكم بستايل المدونة الجديد (ترا تعبت و انا ارسم المثلثات الحلوين )


المهم اخر تدوينة كتبتها قبل ما اجيب بنتي العسولة (منار) الله يحفظها بشهرين .. يعني ليا سنة و نص ماكتبت شي جديد..
منار قبل أسبوع

كنت مشغووولة مررة بالامومة و الدراسة و النقل لشقتنا اللطيفة و الحمدلله كل شي يتم على احسن حال..

الأمومة أحلى و أصعب شي بالحياة .. بنتي أخذت وقتي كله .. و كأني صرت عايشة عشانها انومها و اصحيها والعبها و أحممها وأكلها و أشربها وووو.. حياتي فجأة صارت تتمحور حول هذا الكائن اللطيف..!! 

و كل يوم عن يوم أعرف ليش الجنة تحت أقدام الأمهات .. الله يرحم ماما و يغفرلها و يجعلها في الفردوس الأعلى يااارب .. 


وكمان باركولي اتخرجت الترم الاول من السنة اللي راحت بامتياز ماشاءالله تبارك الله من جامعة الملك عبدالعزيز تخصصي "غذاء و تغذية" .. اذا تعرفوا احد في جدة حابب يوظفني أكون لكم من الشاكرين .. 

وطبعا بما انه بنتي صارت شاغلة وقتي كله و صرت ربة بيت فاضية لاشغل ولا دراسة ..   

حابة إني أعود للتدوين مرة أخرى خصوصا إنها إحدى هواياتي اللي لقيت نفسي فيها و أستمتع بها ..
عندي أفكار كثير بس مكركبة و يبغالها ترتيب .. 

أفكر أكتب مواضيع نصائح و الطرق اللي استخدمها في العناية بمنزلي الصغير طرق التنظيف المختلفة .. 
الاشياء اللي استخدمها و حبيتها أو ماحبيتها .. 
و ربما القليل من النصائح "الميكابية" <<<--- nbsp="" p="">

و افكر ولكني مازلت مترددة في فتح قسم خاص بتخصصي منها تستفيدوا من المواضيع اللي اقرأها و النصائح اللي اجمعها و بنفس الوقت انا استفيد و اتذكر الاشياء اللي درستها ... و لكن الموضوع مازال قيد الدراسة .. 


عموما .. اذا لسه فيه أحد يتابعني خخخخ ألهموني بمقترحاتكم ..
وسعيدة جدا بعودتي .. 


6 تعليقآتكم:

تونا جاوية بالنكهة اليابانية يقول...

وحشتينا يا ري ري :)
ربي يسعد بنوتتك الطعمه ما شاء الله، نستنى ابداعاتك

bsyem A. يقول...

هلا ري ري .. وانتي بخير وعافية , ماشاءالله عليك يعني طبقتي المثل ( من طول الغيبات جاب الغنائم ), أهلا بعودتك عسولة منورة المدونة انتي وكتكوتتك الله يحميها ..

آه شعور جميل الامومة ورائع , يكون لك طفل تدلعينه بكل انواع الدلع والاهتمام والتربية الحلوة , عالم الاطفال عالم جميل وممتع وكل ماتعمقتي فيه اكتشفتي شي جديد وجميل ,>> اللي يسمعني يقول عاشت الامومة هههه لكني متشوقة جدا لهذي اللحظة الله يرزقني بالزوج الصالح والذرية الطيبة ..

وماشاءالله عليك مدونتك من افضل المدونات عندي , وانا اول وحدة اشجعك اكتبي كل مايخطر في بالك , والنصائح والمواضيع المفيدة الله يجزيك الجنة عليها نستفيد منها وخصوصا من التجارب ..

أما بالنسبة ل( ستايل المدونة ) راااائع واكثر من رااائع , وعقبالي انا الكسولة وارجع لتصميم مدونتي الصغيرة هههه انشغلت بالروتين اليومي والشغل ولان ماعندي لاب توب خاص فيني تركت المدونة وزماااان عن جلسة اللاب توب

غير معرف يقول...

الحمد لله ع السلامه,,,
عودا حميدا... ويقر عينك بمنوووره ...

أممم بخصوص الوظيفة وبما إنك تخصص تغذية .. أنصحك تحطين سيرتك الذاتيه في إدارات التغذية سواءاً بالمستشفيات أو جامعة عزوز ... وفالك التوفيق ،،،

Naif يقول...

ماشاء الله .. الله يحفظ لك البنوتة ويصلحها ..
ويزرقك بالوظيفة قريبا جدا ..
بالتوفيق

Nora يقول...

يااهلا وسهلا لك وحشه ري ري بس اشوا انك عندي في الانستقرام
وكويس اللي رجعتي لمدونتك على فكره جمييييل الستايل مره
والله يخليلك بنوتك مره كوااااي ^^

ري ري يقول...

تونا حبيبتي و ربي يسعدك و يسعد حبايبك كلهم يارب ..
تسلمي ياعسل .. =)

-----------------------------------
بسوومة الجميلة
منووورة فيكم المدونة ياقلبي ..
هههههههههه ياعمري تذكريني بوحدة من صديقاتي العزيزات اسمها بسمة برضو .. الله يسعدكم و يرزقكم الزوج الصالح و الذرية الطيبة ياااارب ..

ياعمري كلك ذوووق والله .. يخليلي التشجيع العسل يارب ..

ما الومك والله مع الغربة و الدراسة الواحد يادووب يلاقي وقت .. الله ييسرلك يارب و ترجعي باحلى شهادة ربي يوفقك ..

-----------------------------

غير معرف .. ههههه
الله يسلمك يااارب ..
باذن الله .. المشكلة ما افكر حاليا بمستشفيات لان دواماتها طويلة و بنوتتي لسه صغيرة .. بس الله ييسر ان شاءالله ..
تسلمي =)

----------------------------
naif
اللهم امييييين ياااارب .. شكرا لك ..

--------------------------
Nora العسولة ..

هههههههه منجد الانستغرام شي حلو الحمدلله ..

عيونك الجميلة حبيبتي ..
ويخليلك احبابك كلهم ياااارب .. =)