Follow Me ~

 

About Me ~

صورتي
جدة, Saudi Arabia
ابنة.. زوجة.. و أم.. خريجة جامعة الملك عبدالعزيز تخصص غذاء و تغذية.. أحب عائلتي الصغيرة و أحب التدوين و الرسم و التصوير و الطبخ و الاكل و كل حاجة حلوة في الحياة .. =)

تابعوني من هنا

تابعوني بالبريد الالكتروني

الاثنين، 26 ديسمبر، 2011

كباب لحم + شيش طاووق ..~


مرحبااا جميعا .. كيفكم ان شاءالله بخير و صحة و سعادة يارب .. 

من زماااان عن المواضيع الجديدة .. و اليومين دي ماعندي صراحة اي افكار او مواضيع او انشطة معينة .. 

و بما اني جالسة لا شغل ولا مشغلة .. فصرت بس اطبخ و أصور .. و بالمرة اجدد نشاط مدونتي حتى لو بموضوع مطبخي..  

الموهيم قبل فترة انا و زوجي وحشتنا المشاوي و جو الشوي و هيك فقررت نسوي مشوياتنا بطريقتنا الخاصة في الفرن .. 
و أبشركم النتيجة طلعت يمممممي 
 

طبعا اعذروني ماصورت الخطوات لانه الموضوع مو محتاج خطوات اصلا هيا كلها خبيص × خبيص 

و قبل ما نبدأ .. دي صورة لوجبتنا اللزيزة .. 

 

راح تلاحظوا اشكال كثيرة بالصورة .. اول مرة جربنا نشوي كباب لحم + شييش طاووق + سمك + روبيان 
<<<---- أدري وش نحس فيه   ههههههههههه

بس للامانة السمك و الروبيان كانوا مش ولابد  .. فقررنا استبعادهم من القائمة ..وادمنا الباقي 



يللا خلاص طولت عليكم نبدأ بالطريقة ..

يفضل انك تبدأي في الدجاج قبل اللحم لأنه لاحظت ان الدجاج ياخذ وقت اطول من اللحم عشان يستوي ..
شغلت فرن الكهرباء من تحت فقط على درجة حرارة 380-400 فهرنهايت قبل ما ابدأ الشغل عشان يسخن مزبووط ..
و كنت افكر اني ارص اعواد الشوي على اطراف صينية .. بس زوجي اخترع شي عجيب زي ما انتوا شايفين في الصورة السابقة ..


جاب اعمدة نحيفة (اعمدة اباجورة عندنا ) و لفها بكمية كبيرة قصدير .. و رصينا عليها اعواد الشوي .. و الشبك اللي تحت فرشناه قصدير عشان لا يتوسخ الفرن من تحت ..

بالنسبة للدجاج عشان يستوي أخذ تقريبا ساعة الا ربع الى ساعة .. و اللحم اخذ من 20 دقيقة الى نص ساعة .. انتي تقدري تاخذي قطعة و تشوفي اذا استوت او لسه ..



لشيش الطاووق نحتاج لـ :

  • صدور دجاج مقطعة مربعات
  • بصل مفروم
  •  زبادي
  • ملعقة صلصة
  • ملح + فلفل اسود + بهارات مشكلة + ليمون

و بس خلاص تخلطوا الاشياء دي كلها مع بعض .. 
و رصيها في عود الشوي و بين كل قطعة و قطعة اضيفي شريحة بصل و شريحة فلفل رومي أحمر .. و استمتعي بالنكهة اللزييييزة .. 

أول مرة شويت ما اضفت ملعقة الصلصة فطلع الدجاج ابيض (كما في الصورة السابقة  خخخ) و يفتقد لبعض الالوان الحيوية 

 بس مع ملعقة الصلصة كان لون الدجاجات لزيز و يفتح النفس .. 



كباب اللحم راح نحتاج لـ :

  • لحم مفروم
  • بصل مفروم
  • بقدونس مفروم
  • ملح + فلفل أسود + بهارات مشكلة + ليمون
  • بقسماط + قليل من الدقيق

طبعا و كما تلاحظون ماعندي مقادير معينة كلها بالكمية اللي تشوفيها مناسبة و كافية بس اهم شي لا تقللي ملح و بهارات و يطلع الاكل ساهي و بدون نكهة ولا تكثري زيادة عن اللزوم و تخربي الدنيا .. انا عن نفسي احطها بالريحة هع يعني احس انه ريحة اللحمة او الدجاج صارت مبهرة ..!!

المهم راح تلخبطوا الاشياء اللي فوق كلهااا مع بعض مزبووط .. و تبدأوا تشكلوها حولين عود الشوي ..

ملاحظة: في البداية واجهت صعوبة و انا احاول اشكلها بس مع المحاولة زبطت .. لازم اللحمة تكون بااااردة نوعا ما عشان تتماسك معاكي و اذا ماكانت باردة عادي بعد ماتخلطي الاشياء مع بعض رجعيها للفريزر شويتين او الثلاجة الين تبرد و ابدأي شكليها .. و طبعا حاولي خليهم قد بعض و نحاف بس مو مرة نحيفة عشان ماتنشف وعشان تسهل المهمة و تستوي تمام .. و استمتعي ..

قديمها مع الخبز أو الارز و سلطة خضراء او سلطة طحينة .. وكاسة سفن اب 

ولا تنسوا تسموا بالله قبل الاكل و بالعاااافية .. 

و اذا زاد شي لا تشيلي هم احفظيه بالثلاجة و ثاني يوم كليها ساندوتشات مع جبن موزاريلا و خيار و طماطم و خس .. يمممي اكتشفت انه طعم الفلفل الرومي المشوي في الساندوتش يطلع يممي 


و خلاااص انطلقوووا ..

الجمعة، 28 أكتوبر، 2011

شوكولاتة × شوكولاتة

بسم الله الرحمن الرحيم
السلام عليكم ورحمة الله وبركاته



شوكولاتة × شوكولاتة



أمس خرجنا السوبرماركت نقضي كم شغلة .. و احنا هناك اتهزأت على حاجة لزيزة .. مشترية كل حاجة بنكهة الشوكولاتة .. !!
صراحة ما اقدر اشوف حاجة بنكهة الشوكولاتة و اروح اختار نكهة ثانية .. مايطاوعني قلبي أبدا أبدا أبدا..!! 

و اذا جربت مرة و سويتها و اخترت نكهة ثانية .. اجلس باقي اليوم كله و ضميري يؤنبني ع الشوكولاتة اللي سبتها ..!!

مدري احيانا احس اني الانسانة الوحيدة اللي تعشق الشوكولاتة لهذا الحد .. حتى يعني اذا شسمو .. فيه أحد يبغى يفرحني بهدية ولا شي لايفكر و لا يحير نفسه .. أحلى علبة شوكولاتة تكفي و زيادة .. !! <<<--- ما تقصد أي حاجة ..!!


و أخيرا .. كل عام و انتم بخير .. و تقبل الله سعيكم و حجكم و صالح اعمالكم ..
لا تنسوا أن تستغلوا هذه الايام العشر بالعمل الصالح .. 



(مامن أيامٍ العمل الصالح فيهن أحب إلى الله من هذه العشر)♥



الله أكبر الله أكبر ، لا إله إلا الله ، الله أكبر الله أكبر ، ولله الحمد ♥





الثلاثاء، 27 سبتمبر، 2011

ياشين التفلفس ..!!



كيفكوووووم جميعا .. ان شاءالله بخييير و صحة و سعادة يااارب ..

طبعا زي ما انتوا ملاحظين و انا أولكم لاحظت .. أنه مدونتي العزيزة صايرة هاااادية مرررة و ما أكتب فيها الا فين و فين .. يعني لما احس انه الموضوع يستحق إني أكتب عنه .. 


ولا أخفيكم انه السر وراء هذا الهدوء هو خوفي من تقديم شيء لا يليق بمستوى الأحبة اللي يتابعوني .. فصرت ما أقدم ولا شي بالمرة..!!!

مع العلم إني لما بدأت مدونتي بدأتها بداية جدا بسيطة و ربما سامجة ..!! كانت مجرد كلمات شعرية اما عجبتني او كتبتها بنفسي .. فما كنت اتوقع انه مدونتي راح يتابعها أحد غيري ( يعني مع نفسيخخخخخ ) لكن تفاجأت خلال الايام و الشهور انه عدد المتابعين في ازدياد ماشاءالله .. لذلك بدأت انتبه لما اكتب هنا .. الى ان وصلت الى هذا الحال .. <<<-- ارسي على بر يا عامي يافصحى !!

المهم زبدة الهرجة اللي فوووق إني قررت ارجع اكتب هنا كل مايحلو لي .. حتى لو كان موضوعي ماراح يأخذ اكثر من سطر واحد .. فأنا راح اكتب .. و ليحدث مايحدث.. !!


عمووومااا عمووومااا مش هنا الهرجة .. هرجتي اليوم راح اتكلم فيها عن الكم يوم اللي راحت .. اللي هيا اليوم الوطني و مايتبعها من أحداث .. و بالتحديد ماراح اتكلم عن الناس اللي ترقص و تسويلنا زحمة في الشوارع وووووو ... لأنه اتكلمنا عليهم كثير و اتشرشحوا كثير ..!!

راح اتكلم هنا عن الناس اللي ترفع ضغطي .. (الناس اللي تحب تتفلفس .. يعني تتفلسف من فلسفة) <<--عيدوا الجملة الاخيرة 3 مرات هع ..

- يعني مثلا خليني اقولكم .. واحد يجلس يقول انه ماراح يحتقل بالوطن لأنه ماعنده بيت او ماعنده وظيفة او او او .. 

هيا بالله ايش دخل وطنك في الموضوع دا..!؟ الوطن هو ارض و سماء هو مكان اتربيت فيه .. ايش ذنب الوطن اذا فيه مجموعة ناس فاسدة هيا السبب في اللي حصل لك ..!؟ (دا طبعا اذا ماكنت كمان انت السبب سواء اهمال او تقصير او او) ..

وطني هيا ارض عشت عليها و اتربيت فيها .. وطني فيه أهلي و ناسي و أصحابي .. وطني منطقة طاهرة على هذه الارض .. بالله ليش ما احتفل فيها ..!؟ مو بس يوم الا احتفل بوطني كل يوم ..!!

- طيب نجي للناس الثانية اللي تتفلفس فلفسة ترفع الضغط و تنرفز منجد .. كنت ادور بين فيديوهات اليوتيوب .. و قفت عند فيديو واحد يقال انه سكران باليوم الوطني و جالس مدري ايش يتريق و يستهبل مع الشعب .. مو هنا المشكلة .. مالي في الفيديو .. انا ليا في الناس اللي تعلق ع الفيديو ..

يجيك واحد يقول .. يعني بالله واحد متبهذل أكيد مو لاقي وظيفة ولا بيت زي الناس وووو أكيد راح يسكر و يسوي وووووو .. 

لااااا بالله .. احلف..!! منجد عذر أقبح من ذنب .. يعني عشان مالقي وظيفة ولا ماعنده بيت يروح يرتكب حرام ..!! يعني بدال مايقوم يشتغل ولايسوي اي شي مفيد في حياته .. يروح يعمل مصايب أكبر و أعظم .. و السبب و العذر جدا قبيييييح ..!! 

و شوية يجي واحد ثاني يقول .. أنا عمري ماشفت احد يكلم نفسه عند الاشارات و حالته حالة الا في البلد دي ..!!

ماااشاءالله تباااارك الله ع الانسان اللي قطع دول العالم من كثر السفر..!! انت رحت شفت باقي الدول و المدن عشان تكتب الجملة اللي ما ادري ايش تبغى دي ..!؟

روح شوف كيف الناس عايشة و تعال احمد ربك ع النعمة اللي انت فيها ..!!


صراحة الموضوع لا ينتهي و كل يوم اقرأ كم فلفسة ترفع الضغط .. بس دحين جوا على بالي الكم واحد اللي فوق

 

و أخيرا نعتذر عن ركاكة الموضوع .. قد لايعجبك المحتوى هذه المرة و لكن لي مواضيع متعددة في نواحي أخرى من حياتنا قد يعجبك أحدها .. لي عودة أجمل باذن الله .. 

الأحد، 7 أغسطس، 2011

درس قاسي ..~

بسم الله الرحمن الرحيم
السلام عليكم ورحمة الله وبركاته

كل عام وانت بخير جميعا .. وجعل الله رمضان عليكم سعادة وخير و صحة وبركة ..

اعذروني فأنا أكتب لكم على عجالة .. نظرا لحالتي الصحية السيئة .. ورغبة مني في التنفيس عن بعض ما اشعر به من ضيق ..

تعلمت درسا قاسيا هذه السنة ولازلت أتجرع مرارة الدرس .. عسى الله ان يجعلها لي تكفيرا و تطهيرا ..

لدي الكثير لأتحدث عن هذا الدرس .. و لكن لي الان قرابة الاسبوعين و انا طريحة الفراش بسبب التهاب في الاذن الداخلية التي بدورها ادت الى خلل في مركز التوازن لدي ..!!

لم أكن أعلم أهمية نعمة التوازن في حياتنا حتى أصابني هذا المرض .. فاشكروا الله كثيرا كثيرا على هذه النعمة العظيمة ..

أنا لم أعد استطيع القيام بأي نشاط عادي في حياتي اليومية .. لا أستطيع الوقوف ولا حتى الجلوس دون أن أستند على شيء .. ولا حتى النظر الى الاشياء .. فكل ماحولي يدووور و يتحرك ..!!


لا تنسوني من دعواتكم .. لعل دعوة صائم منكم عند فطره تستجاب باذن الله ..

عموما ليس هذا هو الدرس الذي تعلمته بالتأكيد .. و لكن هذا جزء من الدرس .. 

ما أتعلمه الان باختصار شديييد .. لا تعلقوا آمـآلكم و تفاؤلاتكم و سعادتكم على شيء قادم .. لا تعلمون ان كان سيأتي كما تمنيتم أم لا..!؟

استمتعوا بأيامكم و لحظاتكم التي تعيشونها الان و اجعلوها كما تريدون و تتمنون .. ولا تنتظروا الايام القادمة .. !!


على أمل أن أشفى قريبا باذن الله .. و استعيد صحتي و عافيتي .. و أعود بما لدي باذن الله .. =)




الأحد، 5 يونيو، 2011

لازلت أحاول ..~


مرحبا و اهلا و سهلا بكم .. متابعيني و زواري و اصدقائي جميعا .. 

ليا مدة طوووويلة عن مدونتي .. و صراحة ليا مدة طووويلة عن عالم النت عموما .. 

مدري بس من لما اتزوجت صرت .. ما ادخل الا اشيك ع الايميل و الفيس و احيانا تويتر و اطلع خلاص .. مع انه احيانا كثيرة يكون عندي من وقت الفراغ ما أُحسد عليه ..!!

يمكن بسبب حياتي الجديدة كليييااا .. اتزوجت و طيران على امريكا ..!! من بعد ما كنت مشغولة بزحمة الجامعة و الصديقات و الاهل و الكسل و الدلع .. صرت مسؤولة عن بيتي .. انتقلت لدولة مختلفة تماااماااا عن دولتي الحبيبة .. ابتعدت عن الناس .. و اصبحت تقريبا منعزلة ...!!

طبعا الشي دا سبب لي اكتئاب كبيييير .. حاولت اكون صداقات هنا ولكن بلا فائدة .. كل اللي افكر فيه اهلي و صحباتي و جامعتي ..!!

بس الحمدلله ربي .. مدري والله هيا الايام عدت بسرعة ولا بشويش ..!! 

كلهااا أسبوووووع و أكون في وطني الحبيييب باذن الله على خير و سعادة .. دعواتكم ..



المهم نرجع لموضوع النت .. حسيت من مدة اني صايرة اتعامل مع مدونتي برسمية كبيرة .. على الرغم من اني اول ماقررت ابدأ التدوين .. كنت ناوية اكتب كل حاجة في قلبي .. و ما احسب حساب اي شي .. لكن شوية شوية تغير الوضع .. و صرت ما اكتب فيها الا اذا عندي موضوع يستاهل الكتابة .. و شوية شوية صارت المواضيع اقل فاقل .. 
و بالتالي قررت انا حضرة سيادتي الموقرة  .. اني ارجع لمدونتي كما كنت اعاملها وكما بدأت معها بكل عفوية .. والله يعينكم عليا  !!

و اول شي راح نزبط علاقاتنا مع المدونات الصديقة .. 

طبعا عرفت انو فيه مدونات كنا عاملين تبادل اعلاني .. و تمت ازالة البنر تبعي من مدونتهم بدون مايبلغوني .. يمكن حسبوني اعتزلت التدوين .. هع

و مدونات ضايفة البنر تبعي عندها بدون ماتخبرني و لهم كل الشكر على ذوقهم .. راح اضيفهم بالقائمة ان شاءالله ..

و اللي صايفني عنده و انا مو ضايفته او حذفته بالغلط او يبغى يعمل تبادل اعلاني معايا .. يخبرني بتعليق هنا او عن طريقة وصلة "اتصل بي" .. =)

و لكم جزيل الشكر ايها الرائعون ..

الأربعاء، 6 أبريل، 2011

صمتي يزعجني ..~!

بسم الله الرحمن الرحيم
السلام عليكم و رحمة الله و بركاته



كثيرا ما نسمع عن ثرثرة المرأة و انها كثيرة الكلام حد الإزعاج ..!!

كم اتمنى فعلا ان تكون الثرثرة هي احدى صفاتي !!

يغلب علي طبع الهدوء و الصمت احيانا كثيرة .. نعم قد تمر ايام اكون فيها كثيرة الكلام و لكنها ايام لاتحسب مقارنة ببقية الايام التي لا اتحدث فيها !!

حاولت ان اتغلب على هذا الصمت و لازلت أحاول !!

كنت اعتقد انني ربما بسبب كثرة تواجدي على الانترنت و تحديدا كثرة كتابتي في مدونتي و على تويتر .. اصبحت قليلة الكلام ..

فقررت ان انقطع فترة عنهما و امتنعت عن كتابة اي شي علني افتح فمي و اتحدث بدلا من الكتابة .. و لكن باءت محاولتي بالفشل .. فانا لا ازال قليلة الكلام !!

اجلس لفترات طويلة وحيدة مع نفسي صامتة .. مما يجعلني اعتقد انني عندما يعود زوجي للمنزل سينطلق لساني بالكلام و اتحدث و اتحدث و اتحدث .. لكن اعتقادي هذا أيضاً باء بالفشل !!

اتمنى فعلا من كل قلبي ان أتخلص من هذه المشكلة التي اصبحت تشغل جل تفكيري .. فانا اشعر ان بداخلي الكثيييير الكثييير الذي اريد ان اخرجه لكن لا اعلم ما الطريقة !! كيف اتحدث ؟ عن ماذا اتحدث ؟

اريد ان اصبح ثرثارة اتحدث عن اي شي صغيرا ام كبيرا .. اتحدث في اي وقت حتى مع نفسي ! اريد ان اسمع صوتي ان اتحدث و اثرثر عن اي شي فقط لا اريد ان استمر في صمتي المزعج !!

^
^
مجرد ثرثرة "كتابية" اخرى .. لعلي اجد من يشعر بنفس ما اشعر به او لعلي اجد من استطاع ان يتخلص من مثل مشكلتي فيساعدني

شكرًا لكم لتحملكم ثرثرتي "الكتابية" !! 
الأربعاء، 23 مارس، 2011

هيئة الامر بالمعروف و النهي عن المنكر .. مجرد تساؤلات ..~

بسم الله الرحمن الرحيم
السلام عليكم ورحمة الله و بركاته

هيئة الامر بالمعروف و النهي عن المنكر .. تلك الرائعة .. التي تواجه تحديات كثيرة في عصرنا هذا .. 

مطالبات بالغائها .. و مطالبات بمحاسبتها .. و مطالبات كثيرة تقف في وجهها .. و ناس تتصيد لهم الزلات و الاخطاء ..

نعم هم مجرد رجال ليسوا بمعصومين عن الخطأ .. و ليس لمجرد خطأ يقع فيه قلة من افرادها .. نطالب بالغائها ..!!

والله اننا في خير كثير لا يعلم به الا العاقل من المجتمعات حولنا .. التي تتمنى وجود هيئة لديهم ..!!

قال تعالى: ( كُنتُم خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ وَتُؤْمِنُونَ بِاللّهِ وَلَوْ آمَنَ أَهْلُ الْكِتَابِ لَكَانَ خَيْرًا لَّهُم مِّنْهُمُ الْمُؤْمِنُونَ وَأَكْثَرُهُمُ الْفَاسِقُونَ) 110 - (آل عمران)‏

.. طالما بقينا نأمر بالمعروف و ننهى عن المنكر سنبقى خير أمة باذن الله .. 

و بالله عليكم من منا الان يأمر بالمعروف و ينهى عن المنكر في مجتمعه الا من رحم الله !؟ "اتذكرلي بالله متى اخر مرة نصحت فيها واحد ..!؟ ولا كمان صرنا نعتبر النصيحة تدخل في أمور الغير .. مصيبة والله ..!!"

هيئة الامر فينا هي التي تذكرنا و تشعرنا من فترة  لأخرى اننا لانزال بخير باذن الله ..!!

ماذا فعلت لكم هيئة الامر حتى تقفوا في وجهها .. و تتصيدوا لها الزلات و الاخطاء..!؟

تمشي في الاسواق تذكر هذا بالصلاة و تذكر تلك بالحجاب ..!؟ أزعجوكم هاه ..!!؟  

اراحتنا ممن لا يخاف الله في اعراضكم و نسائكم ..!؟ "ولا بس تفتكروهم لما يطيح الفاس بالراس .. و اول ناس يجوا على بالكم يساعدوكم هما الهيئة .. صح ..!؟"

اراحتنا ممن يحاولون نشر الفساد فينا بادخال المسكرات و الافلام الاباحية ..!؟ " ولا كمان قولولي تبغوا البلاوي دي تدخل عندنا و نصير فري ايش المشكلة ..!؟"

القت القبض على السحرة و المشعوذين ..!؟ 

والله ان هيئة الامر فينا لهي ربما تقوم بدور أهم و أكبر من دور رجال الامن ..!!

ربما حدثت اخطأ منهم و زلات .. لكن هذا لا يعني ان نطالب بالغائهم و ان نتصيد لهم كل كبيرة و صغيرة ..

دار بيني و بين زوجي نقاش قبل ايام جعلني أفكر فعلا لماذا ..!؟

لماذا لا يكون لرجال الهيئة زي موحد كالبقية ..!؟ عندما يرتدون هذا الزي يكون لهم كامل الصلاحية لممارسة عملهم كأي موظف آخر .. و بدونه بالطبع يكون مواطن عادي .. و الزي يكون مختلف عن الزي المدني ..

بهذه الطريقة لن ترتكب حماقات من بعض المواطنين المتحمسين للدين و تنسب للهيئة ..!! "وبالتالي ماراح يصدقوا الخفافيش و يبدأوا هجوم على الهيئة ككل..!"

لماذا لا تكون سياراتهم ايضا لها شكل رسمي ..!؟ "ليش سياراتهم أي جمس و عليها لصقة الهيئة ..!؟ أي أحد ممكن يسوي زيها ..!؟"


و زادت تساؤلاتي هذه .. عندما قرأت خبراً اليوم عن توحيد لون سيارات الاجرة و زي سائقيها ..!!!

أليس لرجال الهيئة الحق بأن يعاملوا كموظفيين رسميين أيضاً كغيرهم من رجال الامن و سائقي الاجرة ..!!!؟؟

و ما المانع ايضا من اعطاء دورات لرجال الهيئة عن كيفية التعامل مع الناس .. ولا تعطى لهم الرخصة حتى يحضروا تلك الدورات و يكونوا كفء لمثل هذا العمل العظيم ..!؟
.
.

و أخيرا سعدت بخبر المكرمة الملكية التي شملت الجميع و منهم هيئة الامر بالمعروف و النهي عن المنكر ..
يعني يااللي مو عاجبتكم الهيئة .. موتوا قهر .. 

.
.

هو مجرد موضوع و تساؤلات تدور ببالي .. و أحببت أن تشاركوني بها .. =)
الأربعاء، 2 مارس، 2011

ولا أحد راضي ..~!!

بسم الله الرحمن الرحيم ..
السلام عليكم ورحمة الله و بركاته ..

يا اهلييين و سهلييين جميعا .. 

كيفكووم ان شاءالله بخييير .. !؟

في يوم من الايام الجميلة .. تحديدا يعني قبل كم يوم هع..!!

كنا ماشيين بالسيارة .. و فجأة نشووف تجممممع كبيييير .. نقرب من التجمع .. نبغى نعرف ايش الهرجة .. طلعوا مجموعة ناس ضد القذافي .. 


طبعا عادي مو هنا الموضوع .. 

احنا نكمل نمشي بالسيارة و نسمع بتجمهر ثاني و اصوات عالية .. لما قربنا .. شفنا ..


مجموعة حريم يطالبوا بحقوقهم .. او شي من هذا القبيل .. و هنا هيا دي زبدة الموضوع ..!!

يعني جلست افكر سبحان الله شي عجيب غريب .. الحريم هنا مو راضيين بوضعهم و مو عاجبهم و هما هنا ماخذين كامل و مطلق الحرية ..!!!

أدوهم حرية ماعرفوا يعيشوا ولا عجبهم الوضع .. طيب ايش نسويلكم يعني ..!!؟؟


و المضحك انو قبل مدة في تويتر هاش تاق طلع يطالب بحقوق المرأة السعودية ..!! ههههه .. يبغوا يصيروا زي الحريم اللي فوق اللي اصلا مو عاجبهم وضعهم ..!!!

و المشكلة بالموضوع .. انو الحريم والله للاسف مو عارفين ايش الحقوق اللي يبغوها بالزبط .. كل وحدة في وادي تطالب بحاجة .. اللي تبغى تسوق .. و اللي تبغى تسافر و تروح  و تجي بدون محرم .. و اللي كارهه رجال العالم كلهم بما فيهم ابوها و اخواها و ووو ..
 و اللي جالسة تقول انتوا ياحريم السعودية منتوا احسن حريم في العالم فاهمين ..!! خير في مدرسة احنا ..!!؟
و بعض الرجال دخلوا يتفلسفوا مسوي انو مع حقوق المرأة والله اعلم هوا ايش مسوي باخواتوا في البيت .. و حتى الاجانب دخلوا في الموضوع يدعموا نسائنا السعوديات للحصول على حقوقهم ..!!! خخخخخخخخخ اول شي شوفوا حريمكم ايش يبغوا بعدين تعالوا ادونا حقوقنا ..!!

و المهم انهم خلطوا الحابل بالنابل .. فيه اشياء دينية مالكم يانسائنا الحق في المطالبة بتغييرها و فيه اشياء جاءت من التقاليد و العادات دي بكيفكم عاد سووا فيها اللي تبغوا .. تتظاهروا تعملولها حملة بكيفكم كل ناس و عاداتهم و تقاليدهم الله اعلم فيهم .. 
و بعدين لا تخلوا الموضوع مجرد عناد بينكم و بين الرجال ..!!! ليش الرجال يسوي الشي فلاني و احنا لا ..!! ليش الرجال يشتغل الشغلة الفلانية و احنا لا ..!! 
اجل بالله مدري مين تقول فيما معناه .. ليش لما نهين الرجل نشبهه بالمرأة .. ولما نرفع قدر المرأة نشبهها بالرجل ..!!! ايش السسسسطحية في التفكير دي ..!! التشبيه مو للاهانة ولا لغيروا انما مجرد وصف بالقوة و الضعف ..!! 

و كمان تم اتهامي بالانانية و اني ما احس ببنات شعبي و بلا بلا بلا ....... من دا الكلام اللي لا يودي ولا يجيب .. بس لانو فيه كم شغلة ماعجبتني و علقت عليها ..!!!

ترا ضغطي ارتفع من بعض العاهات اللي بالمجتمع بالله كبروا عقولكم ..!!

اي نعم فيه اشياء عندنا و انظمة غريبة عجيبة ليس لها علاقة بالدين .. يبغالها تغيير و استئصال من جذورها .. لكن فرقوا بينها صح .. نادوا و طالبوا صح .. و انا اول الداعميين .. بس مو بالشكل التووحفة دا ..!!

يعني سبحانك ربي شر البلية مايضحك .. بعض الحريم ما أدري ايش يبغوا في حياتهم .. لا هنا راضيين ولا هناك راضيين ولا شي عاجبهم ..!! 

ما نقول الا الحمدلله على كل حال .. والله لا يبلانا ..!!


السبت، 29 يناير، 2011

قال ايش .. لو نزل ثلج في جدة قال !!

بسم الله الرحمن الرحيم ..


اعزائي .. اعتذر لكم من اعماق قلبي ع التخيل السخيف و المخيف ! اللي اتخيلتوا في تدوينتي السابقة .. سلمولي على جدة ..~!

قال ايش قال لو ينزل ثلج على جدة !! مدري "وش كنت أحس فيه" و انا اكتب التدوينة السابقة !!

هيا شوية مطرة و اتبهذلت الدنيا و جدة "غــيــر قت" !! كيف ثلج كمان !!

المشكلة و اللي يقهر القلب مش انو احنا في جدة مو قادرين نسوي مجاري زي الناس ولا عندنا امكانيات ولا فلوس .. المشكلة في الناس الـ &*%^#*#$)$%^*^&^*%)$)$&#&# اللي ما تخاف ربها .. و سارقة فلوسنا .. و مضيعة الامانة .. حسبي الله و نعم الوكيل فيهم ..
"الصور التالية وصلتني ع الايميل"

































































 
 
 

 
 
 
 
 
 
 
^
^
شكلو دا احسن حل لأهل جدة بلا سيارات ولا الواحد يشيل هم يغرق ولا يطيح في حفرة كدا مضمون الطريق ان شاءالله !!


والله قلبي محروووق كل ماشفت صور جدة .. مني عارفة لما ارجعلها ان شاءالله بعد كم شهر هل راح اعرفها ؟؟

مدري يعني هل هنا الناس اللي ماعندهم دين يحث ع الامانة و الاخلاص احسن مننا في شي !؟

هل الناس اللي ما عندها دين يحث على ان تحب لأخيك المسلم ما تحب لنفسك احسن مننا في شي !؟

تنزل علينا عواصف ثلجية و امطار رعدية و الحمدلله مو خايفيين من شي ولا شايلين هم شي بالعكس اجلس مبسوووطة اتفرج على خليط الثلج و المطر الجميل ..

و ثاني يوم الصباح نصحى و نروح دوامتنا ماشيين على شوارع نظيفة ..!!









ليييييش ليييييييييش ليييييييييش هنا مسلمين بلا اسلام .. وعندنا اسلام بلا مسلمييين .. ليييييييييش =""(

ليييش ح يكبروا اطفال متعقدين من المطر .. من الشي اللي المفروض يكون خير و حاجة تفرح ..!

لييش ح يعيشوا اطفال بدون اهاليهم لانهم ماتوا بسبب مطر ..!! عشان حضرة مسؤليين الامانة خانوا الامانة !؟

حسبي الله ونعم الوكيل