Follow Me ~

 

About Me ~

صورتي
جدة, Saudi Arabia
ابنة.. زوجة.. و أم.. خريجة جامعة الملك عبدالعزيز تخصص غذاء و تغذية.. أحب عائلتي الصغيرة و أحب التدوين و الرسم و التصوير و الطبخ و الاكل و كل حاجة حلوة في الحياة .. =)

تابعوني من هنا

الاثنين، 2 ديسمبر 2013

فرن السيراميك و العناية به


كيفكم صبايا؟ ان شاءالله تكونوا بخير و سعادة 

الموضوع باين من عنوانه .. راح اتكلم عن طريقتي في تنظيف فرن السيراميك .. و راح اتكلم عن كم نقطة بداية و بعدين اوريكم بالصور طريقتي في تنظيف فرن السيراميك ..

اول شي انا جربت فرن الغاز و فرن الكهرباء الحلزوني و فرن الكهرباء السيراميك .. و بالنسبة ليا كلها ماتفرق عن بعض و حلوة في الطبخ و الخبز و كل شي .. 

بس بالنسبة ليا كان افضل خيار هو فرن الكهرباء السيراميك لعدة اسباب .. 
اولها و اهمها هو سهولة التنظيف و مايحتاج تفكي عيون ولا تركبي عيون ولا غسيل ولا حوسة هو سطح واحد تمسحيه و تنظفيه و تخلصي .. 
ثاني شي كون شقتي تقع في دور ثاني يعني ح يكون فرن الغاز شي مستبعد .. عشان لا نتعب و احنا نطلع و ننزل باسطوانات الغاز ..  

فزي ماقلت فرن الكهرباء السيراميكي كان افضل خيار بالنسبة ليا .. فكل وحدة تفكر بخياراتها و ايش الانسب و الاريح لها ..

وبعد ماقررت نوع الفرن و قبل ما اشتريه كنت مترددة لاني ما اعرف طريقة العناية فيه و كان فيه انواااع كثيييرررة بالسوق .. و لفيت ع المحلات اكثر من عشرين مرة عشان اقرر نوع الفرن اللي احتاجه و هل تأسيس الكهرباء في بيتي تناسب او لا .. 
وكنت احيانا كثيرة لما اقرر اخد نوع اروح السوق الاقيه مخلص .. الين استخرت و قررت و اخذت فرن اسود من ماركة فريجيدير (frigidaire)

المهم لما تشتري اي جهاز في العالم اول شي تسويه و قبل ماتستخدمي الجهاز تقرأي الكتيب اللي يجي معاه من اوله لاخره .. 
راح تعرفي كيف تستخدمي جهازك و كيف تعتني فيه و ايش الاشياء اللي تنفع او ماتنفع جهازك ..

بالنسبة لافران السيراميك عموما .. لازم قدورك اللي تستخدميها تكون قاعدتها مسطحة و مستوية عشان تثبت ع الفرن و عشان تتوزع فيها الحرارة صح .

ثاني شي قدور الالمنيوم ماتناسب فرن السيراميك لانها تبقع و تترك اثر عليها.

لااا تحطي قصدير تحت القدر وفوق عين السيراميك ح يذوب و يترك اثر وحش و يخرب فرنك!

تقريبا دي اهم النقاط اللي افتكرها حاليا .. اذا فيه شي معين حابين تعرفوه قولولي .. 

ننتقل دحين لطريقتي في تنظيف فرني .. 

اول شي صورة فرني وهو في اقذر حالاته ههههههه

اول ما اشتريت الفرن جا معاه المنظف تبعه و الاسفنجة الخشنة نوعا ما لتنظيفه .. 
بس بعدين خلص المنظف و الاسفنجة انهلكت من التمسيح .. فلما رحت السوبرماركت بحثت عن شي مخصص لفرن السيراميك و مالقيت للاسف .. (يقولوا فيه في ساكو بس لسه مارحت ادور اذا خلص اللي عندي ان شاءالله) 

المهم اني اخترت كريم التنظيف جف بالحبيبات الفعالة .. و الاسفنجة اللي استخدمتها فيليدا (vileda) 
طبعا استخدم الجزء الخشن منها .. و هيا بالنسبة ليا احسن نوع اسفنج جربته سواء لتنظيف الصحون او الحمامات .. الله يكرمكم ..

طبعا طريقة الاستخدام احط من الكريم على عيون الفرن او مكان البقع و اتركه دقائق .. ( عشان فرني مررة وسخ عبيته كريم المرة دي هههه)


وبعدها افرك بالاسفنجة


بعد كدا اجيب مناديل مطبخ او منشفة مبلولة و معصورة و امسح الكريم .. و بمناديل جافة امسح مرة ثانية و ارجع امسح بمنشفة مبلولة و بعدين جافة و انتهيت و صار فرني تقريبا يلمع .. ماشاءالله تبارك الله 


اتمنى تكون النتيجة عجبتكم و استفدتوا ولو قليلا من الموضوع .. 

كونوا بخير 







26 تعليقآتكم:

غير معرف يقول...

مرحبا اختي وماشاء الله عليك، شكرا للبوست المفيد وانا مفكره اشتري فرن سيراميك بس سمعت انو ماينفع له اي اواني للطبخ، لازم نوع معين، ممكن تشرحين اكثر من تجربتك وربي يجزاك خير

غير معرف يقول...

مرحبا اختي مره اخرى، ايضا لدي استفسار عن كيف تشغلين الفحم علي فرن السيراميك، سمعت انه ماينفع وقريت بالنت بعد انه ماينفع تسوين شيره/سكر عليه؟ استغربت جدا من هالكلام

تسويق الكترونى يقول...

ههههههههههههههه عجبتنى جدا
"اول شي صورة فرني وهو في اقذر حالاته "
هههههههههه

ري ري يقول...

مرحبا اختي اللي بدون اسم .. =P
بالنسبة لاسئلتك اول شي القدور افضل شي الستانلس ستيل ..مشكلة قدور الالمنيوم انها تترك اثر على عين الفرن بس تروح بالتنظيف .. والقدور عموما لازم تكون قاعدتها مسطحة طبعا عشان تثبت ع الفرن و تتوزع فيها الحرارة ..
و بالنسبة للفحم صحيح ماينفع تولعيه ع الفرن انا استخدم فحم سريع الاشتعال و اولعه بالولاعه او تقدري تجيبي عين حلزونية كهربائية اللي تجي لوحدها عشان الفحم و الحاجات دي ..
اما الشيرة طبعا تقدري تعمليها عادي بس مشكلتها انها لو انكبت ع الفرن اعتقد ممكن تكسره لاسمح الله حسب ما اتذكر من الكتاب اللي جا مع الفرن .. انا قد عملت شيرة اكثر من مرة بس اهم شي يكون قدر عميق عشان تضمني انها ماتتكب باذن الله ..
ان شاءالله اكون افدتك و اعتذر ع التأخير

ري ري يقول...

تسويق الكتروني .. سعيدة بتعليقكم ههههه =)

غير معرف يقول...

احس المساحة بين العيون جداا بسيطة بعكسس المساحة بين عيون فرن الغاز ،تكون واااسعة ،،هل عانيتي من ذي المشكلة او واجهتك صعوبة لما تبغي تركبين اربع قدور على الفرن؟؟تكفين ردي علي لان ناووية عليه بإذن لله لأمي

ري ري يقول...

هلا فيك اختي ..
بالنسبة لدي النقطة ابدا ماحسيتها مشكلة من ناحيتي .. احيانا كثيرة استخدم الثلاثة او الاربعة عيون عادي بدون اي مشكلة وماحسيت بضيق ..
واذا كنتِ متخوفة من دي النقطة احب اقولك انه فيه للفرن السيراميك احجام اكبر من دا الموجود عندي فتقري تستخدميه براحتك و بدون ماتشيلي هم زحمة القدور .. =)

غير معرف يقول...

السلام عليكم الله يسعدك ياختي دنيا واخره يارب
وانتي اللي خليتيني اشتري الفرن،،وبصراحة مرررره حلوو واعجبني كثير،،لكن فيه مشكلة صغيرة ماانتبهت لها ،وهي ان الفرن اللي تحت مايشتغل من فوق وتحت مع بعض،يعني من تحت حتى تستوي الحاجة اللي انا حاطتها ثم اشغل اللي فوق حتى تحمر،وابغى اعرف كيف تعاملتي مع ذي النقطة،،لاني احيانا اسوي اصناف كثيرة فقعب انو اسوي الشغلة بالدور هههههههه،،بس هذا الشي السلبي اللي واجهني وحابه اشوف كيف تعاملتي معاه من ذا المشكلة وشكرررررا ويعطيك الف عافية يارب

ري ري يقول...

وعليكم السلام ورحمة الله و بركاته
اميييين يارب و اياك ياعسولة .. هههههههه سعيدة جدا والله اني قدرت افيدك بشي .. و تتهني فيه و تستخدميه بالعافية يارب ..
بالنسبة للفرن صحيح نسيت اذكر النقطة دي .. بس ما ادري الصراحة اذا كل انواع الكهرباء ماتشتغل فوق و تحت او بعضها بس ..
عموما اللي عندي مايشتغل فوق و تحت سوا .. و صراحة عادي جدا ماواجهتني معاه مشاكل بس اهم شي قبل ما ادخل اي شي للفرن اتأكد انه حامي .. و تستوي فيه الكيكة و البسبوسة و كل شي تمام و اذا احتاجت تحمير اولع اللي فوق و استنا عليه شوية و تتحمر مية مية ههههههه ..
ان شاءالله ماراح تواجهك مشكلة من دي الناحية و استمتعي بفرنك الجديد =)

غير معرف يقول...

مشكووورة يعطيك الف عافيه موضووع جميل جدا وفادني
توني شاؤيه فرن فريجيدير كهربائي واسعدني قرائة موضوعك

غير معرف يقول...

جزاك الله خير وانا عندي نفس المشكله التنظيف والحمد لله استفدت من موضوعك
وبخصوص الفرن انا الحمد لله يشتغل من فرق وتحت واذا ابغى كل واحد لحاله اقدر بس بخصوص المروحه ماعرفت استخدامها حق ايش 🙈😂

Unknown يقول...

شكرا لك ...
افدتينا كثيرا ..
بالنسبه لافضل انواع افران السيراميك سمعت ان افضلها جنيرال الكتريك وإل جي
انتي مارأيك وماذا تنصحيني بشرائه ..
ويعطيك الف عافيه

ري ري يقول...

اهلا عزيزتي Toolay

العفو وسعيدة اني افدتكم ولو بشي بسيط ..
بالنسبة لافضل نوع .. الصراحة ما اقدر افتيلك لاني ماجربت فرن سيراميك الا اللي عندي و اكيد كل شركة و لها مميزات و بالنسبة لجينيرال اليكتريك الصراحة شهادتي فيها مجروحة لانها شركة معروفة بجودة اجهزتها و كانت ليا حوالي سنتين خارج المملكة و اجهزة البيت كلها جنرال و كانت كلها رووووعة ماشاءالله تبارك الله ..
انتي شوفي الفرن تبع كل شركة و ايش مميزاتها و ايش اللي ترتاحي له و استخيري و توكلي على الله ..

والله يوفقك بالشي اللي يسعدك 🌹

غير معرف يقول...

يعطيكي العافيه يا البي عالموضوع انا بعمل عزايم كتير وعندي فرن غاز وحرارتو عاليه بس مضطره غيرو لان بدي غير ديكور المطبخ فياترى حرارة فرن السيراميك عاليه وبساعدني بالعزايم الكبيره ولا ارجع اشتري فرن غاز

ري ري يقول...

ياهلا اختي والله يعافيك يارب ..
بالنسبة لحرارة الفرن صراحة مدري ليش كثير ناس خايفين انه الكهرباء مايكون حار زي الغاز .. انا للامانة مدري اذا فيه فرق كبيير و مؤثر على عملية الطبخ او لا .. بس اللي متأكدة منه انه الفرن يصير حااااار وانتي تتحكمي بحرارته ودا اجمل شي فيه .. تقدري تجربي فرن كهربائي عند اي احد من قريباتك او صديقاتك

Unknown يقول...

جزاكي الله كل خير اكثر من رائع هالموضوع

ري ري يقول...

أم عمر عبدالرحمن

امين يارب اجمعين .. سعيدة لما اعرف انكم فعلا تستفيدوا من المواضيع اللي كتبتها 🌹

غير معرف يقول...

ماحدا سالك وانت ماحكيتي عن هالموضوع وهو هل بيكهرب بصراحة هاد المخوفني منو انا انو بيكهرب وكزا سخص جابو وحكالي بيكهرب لما بيمسحوه او يجي ماي عليه افيدينا الله يسلمك يارب

ري ري يقول...

المعذرة ع التأخير اختي بالنسبة ليا ماشاءالله تبارك الله الين اليوم ماكهربني الحمدلله .. هو عموما فيشته لازم تكون ارضي لا تسأليني كيف لانه زوجي والكهربائي خلصوا الموضوع ..

Unknown يقول...

صباح / مساء الخير
الفرن حقك مثلي تماماً واصعب شي تنظيفه :(
بسألك هل الفرن فيه خاصية التنظيف الذاتي ؟

ري ري يقول...

اهلا اختي samsooma ..مسائك سعادة يارب .. لا للاسف مافيه تنظيف ذاتي .. بس فيه بخاخ مستر مصل لتنظيف الفرن من داخل جدددا جميييل ومفيييد وينظف من قلب .. انصحك فيه .. =)

غير معرف يقول...

مرة شكراً ع الموضوع الحلو
بسألك اذا تعرفي هل قدر الفخار الغير مطلي عادي لو نطبخ فيه علو فرن السيراميك او لا ؟
وشكراً مرة ثانية

ري ري يقول...

اهلا اختي للاسف ماعندي اي فكرة عن الموضوع ولا قد جربت الصراحة ..

غير معرف يقول...

معلش اختي انا فىرتي نمفس حقك بس لما اشغل الفرن من تحت بعد 10 دقاىق يطلع صفير ويطفي الفرن وانا بصراحة ماعندي الكتاوج لانه اشتريته من احدى الاخوات سافرت وباعته ياريت تخبريني هل في الكتلوج معلومات تفيديني لانه يلدوا انه مبرمج على 10 دقائق وكيف الغيها وجزاك الله خيرا

ري ري يقول...
أزال المؤلف هذا التعليق.
ري ري يقول...

اهلين اختي حياك الله .. بالنسبة للفرن ما اعرف يمكن موديله مختلف لانه فرني مافيه اي شي اقدر احدد من خلاله وقت وبعدين يطفي ..

بسسس عادة الفرن تقدري تتحكمي بالوقت من زر "time" يعني بعد ماتضغطي "bake" وتحددي درجة الحرارة .. تقدري تختاري المدة اللي يكون فيها الفرن شغال من زر "time" .. وليس "clock" .. وبس جربي وقوليلي اذا زبط معاك الموضوع